Estatistika apur bat

Durangoko XI. Duatloiaren bezperan gauden honetan, eta probarako izen emateak itxita daudela, izen emateen inguruan estatistika apur bat egin dugu.

Azken hiru urte hauetan izen emateak nolako bilakaera izan duen jakin nahi izan dugu; batetik, izen emateak zabaltzen direnetik isten diren bitartean, noiz ematen duen kirolariak izena, eta bestetik, genero ikuspegitik, izen emate kopuruaren  bilakaera.

Zenbakiak testuinguruan jartze aldera, nabarmentzekoak diren zenbait datu eskainiko ditugu:

• 2016an, distantzia olinpikokoan jokatu zen duatloia eta azken urte bi hauetan, sprint distantzian.
• Aurten ez bezala, iaz proba bi eman ziren asteburu berean (Ermua eta Durangon)
• Aurten, Durangoko Duatloiaren aurreko asteburuan ez da Euskadiko Triatloi Federazioaren inongo probarik izan.
• Inskripzioaren epea, proba ospatzen den astearen lehen egunean (astelehenean) ixten da.

Izen emate kopuruari dagokionez, hau izan da urtez-urteko bilakaera:

• 2016 urtean: 186 inskripzio.
• 2017 urtean: 139 inskripzio.
• 2018 urtean: 228 inskripzio.

Inskripzioak nola egiten diren ikusteko, ondorengo grafikoa prestatu dugu, non X ardatzean izen-emate azken egunerako zenbat egun falta diren irudikatzen den:

Garbi ikusi daiteke, azken hiru urteetan ere, probaren inskripzio epeko azken egun bitan izen emateen %60a pilatzen dela. Kirolariak inskripzio epea agortzen du, dela eguraldia zein den jakiteko edo inskripzioa egin ondoren lesio bat izan eta probara ez joateko arriskua txikitzeko.

Proban izena ematen duten kirolarien generoari dagokionez, hau da bilakaera:

Urtero parte hartzen duen kirolari kopuruak gorabeherak baditu ere, emakumeen parte hartzeak gora egin du azken urte hauetan: 2016 urtean inskripzioen %5a zen emakumezkoa; %10 2017an eta %15 2018an.